Méi Kommunikatioun beim CO2-Ausstouss vu Fligerticketen

Verschidden Online-Buchungsplattforme weise virum Kaf vun engem Fluch un, wéi vill CO2-Emissiounen duerch de Passagéier bei sengem Fluch wäerten ausgestouss ginn. D’Basisrechnung besteet doranner, datt een den CO2-Ausstouss vum Fliger fir eng definéiert Streck hëlt an dës duerch d’Unzuel vun de Sëtzer am Fliger deelt. De Calcul ka selbstverständlech nach verfeinert ginn, andeems ee gewësse Variablen mat an d’Berechnung hëlt: Fligertyp, Gréisst vun der Sëtzplaz am Verhältnis zum Fliger (z.B. Businessklass vs Economy), Ressourcëverbrauch vun de Servicer am Fliger (z.B. de Menü, deen de Passagéier auswielt huet) an esou weider.

Am Sënn vun der Transparenz an enger klimafrëndlecher Mobilitéitspolitik, wär et interessant d’Passagéier aktiv z’informéieren, wat si duerch hire Fluch un CO2-Emissiounen ausstoussen. Esou kéint een den CO2-Verbrauch scho virum Kaf op der Online-Plattform uweisen an et kéint een och duerno de Verbrauch op den Ticket dropsetzen. D’Käschten, fir dëst ze realiséieren, wäre marginal.

  1. Wär et, dem Minister no, nëtzlech, datt de CO2-Verbrauch vu Flich um Fligerticket géif affichéiert ginn?
  2. Wëssend, datt de lëtzebuergesche Staat Aktië bei der Luxair huet, an un den Decisiounen am Verwaltungsrot vun der Luxair ee Stëmmrecht huet an deemno déi voll Rechter a Fliichte vun engem Aktiebesëtzer an enger Entreprise notze kann, wäert ee vun de Minister senge gesandte Fonktionnären dës Iddi eng Kéier am Verwaltungsrot uschwätzen?
  3. A menger Fro n°780 vun 2019 war riets gaangen iwwert d’Kerosinssteier. De Minister hat bestätegt, datt d’Regierung eng europäesch Steier wéilt an d’Thema och ugeschwat hat. Mëttlerweil si mer 2021: goufen et schonns Entwécklunge bei der Realiséierung vun enger europäescher Steier? 
    Wat ass hei den aktuelle Stand a wéi wäert d’Regierung dëse Sujet an de nächste Méint behandelen?

Verlaf an der Chamber

Fro Nummer 3446

Lëtzebuerger Journal

D’Regierung huet vir, datt d’Online-Printmedien an Zukunft gestäerkt ënnerstëtzt a mam Pabeier-Journalismus gläichgesat solle ginn. Wéi 2020 Joer annoncéiert gouf, wäert de Lëtzebuerger Journal vun 2021 un och de Wee vum Online-Journalismus goen, an zwar radikal: d’Printversioun soll nämlech komplett agestallt ginn. Wat d’Beispill vum Journal e bësse speziell mëscht, ass den Ëmstand, datt et sech hei ëm ee klassesche Fall vu Parteipress ze dinn hunn.

Esou ass gewosst, datt am Verwaltungsrot vun den « Editions Lëtzebuerger Journal » praktesch nëmme Membere vun der DP sëtzen. Dat selwecht gëllt fir den Haaptaktionär, d’Asbl « Centre d‘Etudes Eugène Schaus », wou quasi sämtlech verantwortlech Positioune mat DP-Membere besat sinn. Wann een d’Statute vun der Asbl liest, fënnt ee Folgendes : 

« L’association a pour objet la propagation des idées défendues par le Parti Démocratique, le tout tant isolément que dans le cadre de la ou des associations et sociétés commerciales dont elle est ou pourra devenir membre ou associé. »

An de Parteistatute vun der DP steet schliesslech, wou d’Memberen sech informéiere sollen : 

« Les membres sont invités à s’informer au Lëtzebuerger Journal, organe officiel du parti, et à souscrire un abonnement ; l’accès à l’information leur sera également facilité par les médias électroniques. ».

Esouguer an der Schoul gëtt geléiert, datt de Lëtzebuerger Journal een «organe de presse partisane» ass. Esou steet et am Manuel scolaire «Instruction civique» vun der 2e geschriwwen: 

« Le Journal est l’organe de presse officiel du parti démocratique ». 

De Risiko vu politeschem Afloss beim Journal ass also zweifellos ginn. Opgrond vun dësen Elementer kann een dovunner ausgoen, datt de Journal éischter eng Parteizeitung an eng Composante vun der DP ass ewéi eng Zeitung, déi onofhängege Journalismus bedreift.

  1. De Medieminister hat an der Äntwert op d’Question parlementaire 1531 vum honorabele Kolleg an Députéierten Sven Clement geäntwert: « Déi Prinzipien vun der Indépendance a Pluralismus sinn zu Lëtzebuerg net a Gefor an d‘Regierung ass décidéiert, déi Prinzipien och weider ze stäerken ». Här Minister, wéi ass d’Onofhängekeet vum Lëtzebuerger Journal garantéiert, a Betruecht vun de Besëtzverhältnisser (Bénéficiares effectifs) an der Verwaltung duerch eng Majoritéit un DP-Memberen am Verwaltungsrot vun der Zeitung?
  2. Ass d’Konzept vun esou enger « Parteipress » nach zäitgemäss, a wéi steet d’Regierung dozou ?  
  3. Ass der Regierung bekannt, ob et weider esou Parteizeitungen hei am Land ginn?
  4. Misst de Lëtzeburger Journal net vill méi kloer affichéieren, datt et sech bei der Zeitung ëm ee Presseorgan handelt, dat an direkter Linn vun der Demokratescher Partei ofhänkt ?  
  5. Här Bildungsminister, wëssend, datt am Cours « Instruction civique » de Schülerinnen a Schüler bäibruecht gëtt, datt de Lëtzebuerger Journal dat « offiziellt Presseorgan vun der demokratescher Partei » ass an den Här Minister Meisch net midd gëtt ze betounen, datt d‘Zeitung sech méi breet opstellt an onofhängeg ass, wäert dëse Passus an der nächster Editioun vum Schoulbuch gestrach ginn? Falls jo, wéini kënnen d’Schüler op der 2e vun engem neien, aktualiséierten Civiquesbuch profitéieren?

Verlaf an der Chamber

Fro Nummer 3405

Gläichberechtegung made in Lëtzebuerg: Firwat sinn d’Spëtzeposten an der Regierung just vu Männer besat?

An den USA kënnt et den 20te Januar, no laange Joren ënnert engem Trump-Regime, zu engem Muechtwiessel, bei där den Joe Biden d’Präsidentschaft fir 4 Joer iwwerhuele wäert. Eng Premiere dobäi ass, datt déi éischte Kéier an der Geschicht eng Fra, nämlech d’Kamala Harris, de Poste vum Vizepresident iwwerhuele wäert. Och an anere Länner op der Welt sinn et net ëmmer Männer, déi d’Spëtzeposten an der Politik besetzen. Et brauch een nëmmen eriwwer an Däitschland ze kucken, wou d’Angela Merkel säit 3 Legislaturen de Poste vun der Bundeskanzlerin besetzt. An der Belsch gouf mam Petra De Sutter eng Transgender-Persoun als ee vun de 7 Vizepremierministere genannt.

Symbolesch hunn d’politesch Spëtzeposten eng grouss Bedeitung, well d’Regierung sech als Representant vun enger oppener Gesellschaft weist. De Message ass, datt een d’Politik onofhängeg vu engem Geschlecht mat gestalte kann. Ob Mann, Fra oder Drëtt Geschlecht, an éischter Linn gëtt de Mënsch mat sengen Erfarungen, Verdéngschter a Kompetenzen an de Virdergrond gestallt.

D’lëtzebuergesch Regierung bekräftegt de Wëllen, Representatioun tëschent de (klassesche) Geschlechter an der Politik an ee bessert Gläichgewiicht wëllen ze bréngen. Zitat aus dem Koalitiounsaccord:

[…] l’accent continuera d’être mis sur une politique en faveur d’une représentation plus équilibrée des femmes et des hommes au niveau de la prise de décision dans notamment les domaines de la politique et de l’économie. 

Mir hunn der Regierung dës Froe gestallt:

  1. Ugesiichts, datt et an eiser Regierung 2 Vizepremierministere ginn, firwat gouf keng Fra fir dëse Posten ausgewielt?
  2. Ass an dëser Legislaturperiod geplangt, dass ee weidert Geschlecht als Vizepremier ernannt gëtt?

Verlaf an der Chamber

Fro Nummer 3402

Wéi vill Jonker sinn hautzedaags an der Gemengepolitik aktiv?

Jonk Biergerinnen a Bierger fir d’politescht Liewe begeeschteren ass wichteg. Um nationalen Niveau ass festzestellen, datt ëmmer méi Jonker sech politesch engagéieren. Um lokalen Niveau gesäit dat awer anescht aus. Nëmme wéineg Jonker engagéieren sech eisen Informatiounen no an der Gemengepolitik. 

An engem Artikel vum 4te Mäerz 2011 hat d’Woxx an engem Artikel d’Altersstruktur an de Gemengeréit zu Lëtzebuerg ugeschwat an heizou Folgendes bemierkt:

[…] Gemeindepolitik gilt heute oft als wenig attraktiv, und die Zusammensetzung der Gemeinderäte kannkaum als repräsentativ gelten. So liegt der Altersdurchschnitt im Gemeinderat von Roeser bei rund fünfzig Jahren.”

Et wär interessant ee Vergläich ze zéien, ob d’Analyse vun 2011 richteg ass an ob sech 2021 eppes un dëser Analyse geännert huet. 

Dofir hu mir der Inneministesch déi folgend Froen gestallt:

  1. Kann d’Ministesch mer, fir d’Joren 2011 an 2021, folgend Donnéeën zum Alter vun de Gemengeconseilleren zu Lëtzebuerg ginn:
    • den Duerchschnëttswäert
    • de Medianwäert
    • de Modalwäert 
    • d’interquartil Differenz tëschent dem éischten an dem véierte Quartil
    • d’Varianz, an op där Basis d’Standardofweichung (écart-type)
    • den Undeel vu Jonken (<30 Joer), déi enger kommunal-politescher Aktivitéit noginn
    • an de Prozentsaz vu jonke Gemengeconseilleren am Verglach mat alle Gemengeconseilleren
  2. Wat ass aktuell, opgeschlësselt no den 20 gréissten an den 20 klengste Gemengen (der Awunnerzuehl no), den Altersduerchschnëtt, de Median an de Modalwäert vun de lokale Mandatsträger? 
  3. Kann d’Ministesch op Basis vun den Zuele bestätegen, datt net vill Jonker sech an der Gemengepolitik engagéieren? Falls jo, wat sinn Ärer Meenung no d’Grënn dofir a wéi gedenkt Dir déi Jonk ze motivéieren sech fir d‘Lokalpolitik ze begeeschteren ? 
  4. D’Woxx hat deemools weiderhi geschriwwen:[…] Ein weiterer Faktor, der ein politisches Engagement erschwert, sind die langen Arbeitszeiten. Während es früher für einen Betrieb noch ein gewisses Prestige bedeutete, wenn ein Mitarbeiter als Gemeindeberater, Schöffe oder Bürgermeister tätig war, zählt politisches Engagement heute nicht mehr viel. Vereinzelt bekommen Arbeitnehmer sogar Probleme, wenn sie wegen ihres kommunalpolitischen Engagements einen Congé politique beantragen.Gouf am Kader vun der Reform vum Gemengegesetz, déi elo schonns zënter der éischter Legislatur vun dëser Regierung diskutéiert an evaluéiert gëtt, de Congé politique op de Leescht geholl? Falls jo, erkennt d’Ministesch schonns eng Tendenz wéi de Congé politique an Zukunft kéint gestalt ginn? 
  5. Wéi vill Matbiergerinnen a Matbierger vun net-Lëtzebuerger Nationalitéit sëtzen aktuell an engem Gemengerot ?
  6. Wat ass de Pourcentage vu Fraen a Männer, déi an der lokaler Politik aktuell e Mandat hunn ?
  7. Fënnt d’Ministesch et opportun, datt dem Prinzip vun Open Data no, di gefroten Zuelen an dëser parlamentarescher Fro a Form vun enger Tabell ëffentlech fir jiddereen um Site vum Ministère asiichtbar wären (wëssend, datt et sech ëm anonymiséiert Donnéeën handelt)? Wäert dëst no der Äntwert vu menger Fro geschéien?

Fro Nummer 3409

Verlaf an der Chamber

FRO.LU: Importatioun vun Hënn aus dem Ausland

Här President,

Sou wéi den Artikel 83 vun eisem Chambersreglement et virgesäit, bieden ech Iech, dës parlamentaresch Fro un de Minister fir Landwirtschaft weiderzeleeden.

Laut Artikel 1 vum Règlement grand-ducal vum Mee 2008 zur Deklaratioun vun Hënn muss fir all Hond, deen an d’Land kënnt, een Zertifikat vun engem Déierendokter ausgestallt ginn. Dësen enthält zum Beispill den Numm an d’Adress vum Besëtzer.

 

Am Arrêté vun 29.10.1918 sinn d’Präisser fir d’Prestatioune vun engem Déierendokter festgeluecht. Dësen Arrêté ass elo iwwert 100 Joer al an d’Präisser sinn nach a Lëtzebuerger Frang.

  1. Gëtt et een uniforme Preis, deen all Déierendokter dierf fir d’Ausstelle vun esou engem Zertifikat froen?
  2. Sinn aktualiséiert Präisser anzwousch festgehalen?

     

    Wou kënnen sech d’Leit iwwert déi aktuell Präisser, déi een Déierendokter fir seng Aarbecht dierf froen, informéieren?

Fro n°3386

Dës Fro gouf op fro.lu gestallt. Surft och dir laanscht an stellt är Froen op www.fro.lu

Verlaaf an der Chamber

Neie Coronavirus an England: wéi reagéiert Lëtzebuerg?

Wéi an der nationaler an internationaler Press haut iwwerall ze liesen ass, goufen et an England – virun allem am Südoste vum Land an zu London – Infektioune mat enger mutéierter Variant vum Coronavirus. Dem brittesche Gesondheetsminister no ass d’Situatioun ganz eescht ze huelen. Déi brittesch Regierung huet dofir bis zum Enn vum Joer ee strenge Lockdown bis zum Enn vum Joer ugeuerdent.

Vereenzelt EU-Länner, wéi d’Belsch, Holland an Italien, hunn aus Virsiichtsmoossnam sämtlech Passagéierverbindungen iwwert Loft a Schinn aus dem Vereenegte Kinnekräich suspendéiert. Och Regierungen aus anere Länner envisagéieren –Stand haut– dat nämmlecht ze maachen.

D’Piraten hunn d’Regierung un dësem Sondëg an enger parlamentarescher Drénglechkeetsfro no méi Informatiounen gefrot:

  1. Wéi evaluéiert d’Regierung d’Situatioun ëm déi mutéiert Variant vum Coronavirus am Vereenegte Kinnekräich?
  2. Wäert d’Regierung, esou wéi eis Nopeschlänner, Passagéierfluchverbindungen tëscht Lëtzebuerg an dem Vereenegte Kinnekräich bis op Weideres sträichen?

Fro n°3349

Verlaaf an der Chamber

Den Ausseministère huet um Sonndegowend folgend Kommunikatioun erausginn:

En Grande-Bretagne, une nouvelle souche du coronavirus a été détectée. Elle est présentée comme plus contagieuse. Le Luxembourg interdit temporairement les vols passagers en provenance du Royaume-Uni à partir de minuit d’aujourd’hui pour au moins 24 heures, ceci par précaution et dans l’attente de nouvelles connaissances scientifiques concluantes. Une instruction en ce sens a été donnée par le ministère de la Santé. Le ministère de la Mobilité a aussitôt demandé à la Direction de l’aviation civile d’ordonner à Luxairport de prendre les mesures nécessaires pour appliquer cette interdiction d’atterrissage pour les vols passagers en provenance du Royaume-Uni.

Aldi-Werbung an enger Zäitschrëft fir nohaltëg Landwirtschaft?

Source: Gudd!–Magazinn vum Landwirtschaftsministère (Dezember 2020). Fonnt op: https://twitter.com/codefiscal/status/1339834513317355520/photo/1

Den 19ten Dezember 2016 huet de Landwirtschaftsministère en neie Magazin virgestallt mam Titel “Gudd!“. Informatioun, Transparenz a Liewensmëttelkontroll waren déi dräi Stéchwierder, déi am Mëttelpunkt sollte stoen. Am Pressecommuniqué vun deemools stoung ze liesen “Qualitativ héichwäerteg, sécher, aus enger nohalteger Produktioun stamend an zu engem abordabele Präis ugebuede Liewesmëttel ze kréien ass méiglech”. E bësse méi wäit war ze liesen “An enger Welt vun Iwwerkonsommatioun gi mer eiser Nahrung net méi déi richteg Wäertschätzung”.  

“GUDD!” gëtt vum Ministère fir Landwirtschaft, Wäibau a Ländlech Entwécklung erausginn a vun der Maison Moderne realiséiert, dat heescht konzipéiert, gesat a gedréckt. E kënnt am Prinzip zweemol d’Joër eraus, den Tirage läit bei 246.000 Exemplaren, an anere Wierder: e läit an all Boîte. Aus dem Impressum geet ervir, datt och d’Publicitéit vun der Maison Moderne kënnt.       

An der aktueller Nummer (Nr. 8.2020 vum 16.12.20) ënnersträicht de Minister nach eng Kéier, wéi wichteg et him ass “den Accent  op d’Promotioun vun eiser lokaler Produktioun ze setzen“ an “datt d’Leit sech mol nees iwwert de Stellewäert vun eiser Landwirtschaft bewosst ginn“. Hie stellt och fest, datt am Fleeschsecteur d’Präisser während der COVID-19-Kriis zeréckgaang sinn.  Am “Gudd!” ass och Publicitéit ze fannen. Reklamme fir Lëtzebuerger Rëndsfleesch, Antigaspi-Initiativen a lokal an equitabel Epicerien hunn hei sécher hir Plaz. Wann allerdéngs, wéi elo op der Säit 27, eng ganzsäiteg Reklamm fir ee bekannten Discounter dran ass, mat Slogane wéi “Eis Feierdeeg, chic an net deier“, da stellt ee sech d’Fro, wéi dat zu den uewegenannten Zieler passt.  

  1. Sinn d’international Discounter e festen Deel vun der lokaler an der Bio-Strategie vun der Regierung?
  2. Ass de Minister net der Meenung, datt de Präisverfall vun de Fleeschpräisser och vun esou international Discounter mat verschold ass?
  3. Op wei engem Niveau gesäit de Minister ee korrekte Präis fir eist Fleesch? Ass de Minister der Meenung, dass bei den internationalen Discounter hei am Land ee faire Präis iwwreg bleift fir de Produzent?
  4. Ass dës Reklamm, wann een d’Dumpingpräispolitik vun esou groussen internationale Gruppe kuckt, net eng riicht an d’Gesicht fir all Bauer hei am Land? 
  5. Wat kascht d’Publikatioun “GUDD!” de Ministère pro Joer? Pro Nummer (opgelëscht pro Ausgab)?
  6. Huet de Minister eng kloer Guideline eraus gi fir eng Publicitéit? Falls jo, no wéi enge Krittären ginn d’Publizitären erausgesicht? Falls nee, fënnt de Ministère et richteg, dass bei esou enger Publikatioun mam kloren Zill, eis lokal Landwirtschaft ze stäerken, alles, och Annonce wou géint eng lokal an nohalteg Produktioun schwätzen, a Punkto Reklamm erlaabt ass? 
  7. Wei eng Oplagen huet de Ministère der Maison Modern mat op de Wee gi beim erstelle vun “Gudd!”? 
  8. Gëtt bei der Verdeelung op d’Restriktioun “Keng Reklamm w.e.g. – Pas de publicité s.v.p.” opgepasst? 

Fro Nummer 3340

Verlaf an der Chamber

Aal Casa-Deponie zu Beggen

Lëtzebuerg huet e grousse Wunnengsproblem, zanter Joerzéngten. Mat engem héije wirtschaftlechen an demographesche Wuesstem steigt och d’Nofro no Wunnengen hei am Land mam Resultat, datt méi muss gebaut ginn. Grad well vill gebaut gëtt, misst eigentlech besser drop opgepasst ginn, wat, wou a wéi gebaut gëtt. Aspekter wéi Zäitdrock, Kompetenzgerangel an den Ëmstand, datt sech zu Lëtzebuerg mam Prinzip vum Pollueur-Payeur oft schwéier gedoe gëtt, sinn an dësem Kontext net hëllefräich.  

Grad dofir geet et net ëmmer duer d’Konformitéit mat de kommunale Planungsvirgaben – PAG a PAP – ze préiwen. Et kënnt och op d’Qualitéit vum Ënnergrond un, net nëmmen um klasséierten Terrain selwer, mee och am direkten Ëmfeld. Och wann déi klassesch Industriebetriber ëmmer méi aus eise Stied verschwannen, bleift den Ënnergrond, op deem dës Industriegebaier joerzéngtelaang aktiv waren oder hieren Dreck gelagert hunn, heiansdo problematesch. 

Ee méi rezent Beispill fir dës Problematik ass een Immobiliëprojet zu Beggen, op der Beggener Strooss (Nr. 131-133), net wäit ewech vun der fréierer CASA-Decharge, en Dossier, deen an den 90er Joren a bis haut zu vill Polemik am Lëtzebuerger Wunnengsbau an Ëmweltschutz gefouert huet. 

D’Continental Alloys, wéi dës Arbed-Duechter geheescht huet, hat grouss Quantitéite vu Schwéiermetaller am Buedem zeréck gelooss, dorënner Stoffer, wéi Chrom, Cadmium, Vanadium, Molybdän oder Titan, déi toxesch fir Mënsch, Déier a Planzewelt sinn a massiv gesondheetlech Schied ervir ruffe kënnen. 

Deen urspréngleche Site vun der CASA-Deponie ass zum Deel entseucht ginn, steet am PAG vun der Stad Lëtzebuerg awer ëmmer nach als « Zone à risque de contamination ». Ouni Tamponszone. A grad ëm déi geet et hei. 

An enger Luxcontrol-Etüd aus dem Joer 2013 steet geschriwwen:

« Dans l’hypothèse de construire des maisons et/ou appartements le long de la route de Beggen (…), la législation relative à la gestion des déchets devra être appliquée lors des travaux de terrassement. Dans le cas où la nappe d’eau n’est pas touchée par les excavations du sol, c’est-à-dire au cas où les ouvrages souterrains ne dépassent pas une profondeur moyenne d’environ 2,50 m par rapport à la route de Beggen, la problématique en matière de gestion des déchets n’est pas jugée importante. »  

An anere Wierder : alles wat méi déif wéi 2,50 Meter an de Buedem geet, ass problematesch.   Zeréck zum Immobiliëprojet op der Beggener Strooss: um Terrain stoung laang Zäit eng Villa. Si huet elo Plaz misse maache fir ee Projet vun enger grousser Residence mat 18 Appartementer. Déi zukünfteg Bewunner wësse warscheinlech net, wien de fréieren Noper war an op wéi engem Ënnergrond si sech nidderloossen. Aus de Baupläng geet ervir, datt d’Residence véier Stäck héich gëtt, awer och zwee Stäck an de Buedem reecht. 5,50 Meter déif gëtt gebaut, also 3 m méi, wéi et vu Luxcontrol als onbedenklech agestuuft ginn ass. 

Eis Nofuerschungen hunn erginn, datt kee sech esou richteg fir d’Problematik zoustänneg fillt. D’Stad Lëtzebuerg verweist op de PAG (« Zone d’habitation 2 ») a fënnt, datt et um Promoteur ass, déi néideg Virsuerg ze treffen an d’Leit ze informéieren. D’Ëmweltverwaltung verweist op de Gesetzprojet iwwert de Buedemschutz an d’Gestioun vun de polluéierte Sitten, deen nach ëmmer an der Maach ass. Eng am November 2020, op eng Privatinitiativ hin duerchgefouert an an Däitschland ausgewäert Proufentnahm, huet erginn, datt d’Belaaschtung um Site nach ëmmer héich a bedenklech ass, z.B. wat de Molybdän ugeet (360 mg pro kg).

  1. Misst bei engem Bauprojet wéi dësem, wou nieft engem verseuchten Terrain gebaut soll ginn, de Bauhär net ganz besonnesch virsiichteg agéieren? Missten d’Autoritéiten hei net méi genee kontrolléieren, dass keng Risiken fir déi nei Residenten entsteet?
  2. Wéi ass et méiglech, datt, am Virfeld vum Bau vum Immobiliëprojet keng Buedemprouwe vu staatlecher Säit aus duerchgefouert goufen?
  3. Maachen d’ëffentlech Autoritéiten – d’Gemeng Lëtzebuerg an d’Ëmweltverwaltung – sech et ze einfach, wann se d’Responsabilitéit op de Promoteur oder de Bauhär ofwälzen? 
  4. De Kadaster fir al Dechargen a kontaminéiert Sitten (CASIPRO) ass dem breede Public nëmme schwéier zougänglech. D’Privatleit mussen oft selwer aktiv ginn a laang investigéieren, fir iwwerhaapt un Donnéeën ze kommen. Misst net och de Staat senger Fürsorgepflicht gerecht ginn an déi néideg Analyse selwer duerchféieren, d’Schantjen iwwerwaachen an d’Informatiounen dem Public ganz einfach zougänglech maachen? 

Fro Nummer 3319

Reform vum Glécksspillgesetz

An der Äntwert op meng parlamentaresch Fro n°2927 huet d’Ministesch d’Präsenz vun 2000 illegalen Internetbornen confirméiert. Festzestellen ass, datt et an de leschte 5 Joer awer zu kenger Veruerteelung wéinst Exploitatioun vun illegale Bornen komm ass an et an deene leschte Joren, wéi et schéngt, keng Efforten ënnerholl goufen, fir dës Bornen iergendwéi juristesch aanescht z’encadréieren.

D’Reglementéierung vum Glécksspill zu Lëtzebuerg huet, der Äntwert vun der Ministesch no, als Ziil Mineuren a vulnerabel Persounen ze schützen a géint d’Glécksspillsucht,Bedruch, Geldwäsch a Cyberkriminalitéit virzegoen. Festzestellen ass awer, datt Lëtzebuerg an deem Sënn net dem Schwäizer Modell nogaangen ass, wou d’Exploitatioun vum Glécksspill fir auslännesch Operateuren generell verbueden ass. 

Et stellt sech d’Fro vun der Kohärenz vun der lëtzebuergescher Approche: engersäits argumentéiert ee mam Schutz viru Risiken, anerersäits ass d’Dier an eisem Land awer grouss op fir all Zorte vu Glécksspiller, déi op Serveren am Ausland iwwert den Internet z’erreesche sinn. D’Resultat ass, datt dausende vu vulnerabele Leit an och Mannerjäreger engem dereguléierte Glécksspillmarché hei am Land ausgesat sinn.

An deem Zesummenhang hu mir der Justizministesch dës Froe gestallt:

  1. Wat wäert d’Regierung an dëser Legislatur vis-à-vis vun den 2000 illegale Glécksspillbornen ënnerhuelen?
  2. D’Ministesch schwätzt an der Äntwert op meng Fro n°2927 dovunner, dass analyséiert muss ginn, ob eis Legislatioun zum Glécksspill muss ugepasst ginn. Ugesiichts vun diverse gréissere Lacunen, virun allem am Bezuch mam Glécksspill um Internet, besteet net elo schonns ee konkreten Handlungsbedarf, fir dat ganzt Glécksspillgesetz vun 1977 op de Leescht ze huelen an déi konservativ Doktrinn vun dësem Gesetz der Modernitéit an der Realitéit vun haut unzepassen?
  3. Misst eng Reform vum Glécksspillgesetz net ëmsou méi envisagéiert ginn, wann ee bedenkt, dass eng Heedewull vu Spiller um Internet dem Charakter vu Geschécklechkeetsspiller entspriechen, déi, no der Äntwert vun der Ministesch op meng Fro n°3141,  kengerlee Autorisatiounen (voire Kontrollen) ënnerleien?

Fro Nummer 3317

Verlaf an der Chamber

Wahlprogramm 2018

Neireegelung vum Glécksspill

Online-Glécksspiller a Wette sinn ee legitimen a milliardeschwéiere Maart, vun dem Lëtzebuerg och eppes kéint hunn.

D’Piratepartei fuerdert de Pseudo-Monopol vum Staat un de Glécksspiller ze briechen a Glécksspill-Gesetzer ze schafen, déi un d’21. Joerhonnert ugepasst sinn.

Journal

Eis Fro gouf an dëser Form leider net ugeholl. Hei fannt dir d’Fro wéi se um Enn huet missten erausgeschéckt ginn.

Lëtzebuerger Journal

Zur Zäit gëtt an der Chamber de Gesetzesprojet 7631 diskutéiert, mat deem een neie gesetzleche Kader fir den Online-Journalismus geschafe soll ginn, wouduerch d’Online-Printmedien an Zukunft gestäerkt ënnerstëtzt a mam Pabeier-Journalismus gläichgesat solle ginn. Wéi et dëst Joer annoncéiert gouf, wäert de Lëtzebuerger Journal vun 2021 un och de Wee vum Online-Journalismus goen, an zwar radikal: d’Printversioun soll nämlech komplett agestallt ginn. Wat d’Beispill vum Journal e bësse speziell mëscht, ass den Ëmstand, datt et sech hei ëm ee klassesche Fall vu Parteipress ze dinn hun. Esou ass gewosst, datt am Verwaltungsrot vun den « Editions Lëtzebuerger Journal » praktesch nëmme Membere vun der DP sëtzen.

Dat selwecht gëllt fir den Haaptaktionär, d’Asbl « Centre d‘Etudes Eugène Schaus », wou quasi sämtlech verantwortlech Positioune mat DP-Membere besat sinn. Wann een d’Statute vun der Asbl liest, fënnt ee Folgendes : « L’association a pour objet la propagation des idées défendues par le Parti Démocratique, le tout tant isolément que dans le cadre de la ou des associations et sociétés commerciales dont elle est ou pourra devenir membre ou associé. »

An de Parteistatute vun der DP steet schliesslech, wou d’Memberen sech informéiere sollen : « Les membres sont invités à s’informer au Lëtzebuerger Journal, organe officiel du parti, et à souscrire un abonnement ; l’accès à l’information leur sera également facilité par les médias électroniques. ».Esouguer an der Schoul gëtt geléiert, datt de Lëtzebuerger Journal een «organe de presse partisane» ass.

Esou steet et am Manuel scolaire «Instruction civique» vun der 2e geschriwwen: « Le Journal est l’organe de presse officiel du parti démocratique ». De Risiko vu politeschem Afloss beim Journal ass also zweifellos ginn.

Opgrond vun dësen Elementer kann een dovunner ausgoen, datt de Journal éischter eng Parteizeitung an eng Composante vun der DP ass ewéi eng Zeitung, déi onofhängege Journalismus bedreift.Wann een d’Montante vun der Pressehëllef kuckt, gesäit een, datt de Lëtzebuerger Journal 2019 974.448,74 Euro ausbezuelt kritt huet. Déi fënnef Joer virdrun huet déi liberal Zeitung all Joer an der Moyenne bal 950.000 Euro krut. Interessant ass och dee gewaltege Sprong tëschent 2012 an 2013, deen iwwregens soss keng Zeitung gemaach huet: vun 606.426 Euro op 893.603 Euro. 

An deem Zesummenhang wéilt ech de Ministeren dës Froe stellen:

  1. De Medieminister hat an der Äntwert op d’Question parlementaire 1531 vum honorabele Kolleg an Députéierten Sven Clement geäntwert : “« Déi Prinzipien vun der Indépendance a Pluralismus sinn zu Lëtzebuerg net a Gefor an d‘Regierung ass décidéiert, déi Prinzipien och weider ze stäerken ». ”Här Minister, wéi ass de Prinzip vun der Indépendance mam konkrete Fall vum Lëtzebuerger Journal ënnert een Hut ze kréien ?  
  2. Ass d’Konzept vun esou enger « Parteipress » nach zäitgemäss, a wéi steet d’Regierung dozou ?  
  3. Ass der Regierung bekannt, ob et weider esou Parteizeitungen hei am Land ginn?
  4. Misst de Lëtzeburger Journal net vill méi kloer affichéieren, datt et sech bei der Zeitung ëm ee Presseorgan handelt, dat an direkter Linn vun der Demokratescher Partei ofhänkt ?  
  5. Kann ausgeschloss ginn, dass am Regierungsrot eng op de Journal optimiséiert Pressehëllef ausgeschafft ginn ass?
  6. Hunn DP-Memberen an der Regierung sech bei den Diskussioune ronderëm den Avant-Projet de Loi am Regierungsrot enthalen, wëssend, dass hier Partei esou eng Parteizeitung huet?
  7. Här Bildungsminister, wëssend, datt am Cours « Instruction civique » de Schülerinnen a Schüler bäibruecht gëtt, datt de Lëtzebuerger Journal dat « offiziellt Presseorgan vun der demokratescher Partei » ass an den Här Minister Meisch net midd gëtt ze betounen, datt d‘Zeitung sech méi breet opstellt an onofhängeg ass, wäert dëse Passus an der nächster Editioun vum Schoulbuch gestrach ginn? Falls jo, wéini kënnen d’Schüler op der 2e vun engem neien, aktualiséierten Civiquesbuch profitéieren?
  8. Här Bildungsminister, wëssend, datt am Cours « Instruction civique » de Schülerinnen a Schüler bäibruecht gëtt, datt de Lëtzebuerger Journal dat «offiziellt Presseorgan vun der demokratescher Partei» ass an den Här Minister Meisch net midd gëtt ze betounen, datt d‘Zeitung sech méi breet opstellt an onofhängeg ass, wäert dëse Passus an der nächster Editioun vum Schoulbuch gestrach ginn? Falls jo, wéini kënnen d’Schüler op der 2e vun engem neien, aktualiséierte Civiquesbuch profitéieren?

Fro n°3316

Verlaaf an der Chamber