Kategorie: News

Um Internetsite vun der Naturverwaltung ass betreffend den Arbres remarquables Folgendes ze liesen : “Les arbres remarquables constituent un patrimoine naturel, culturel et historique à part entière. Afin d’en promouvoir la conservation, le Ministère du Développement Durable et des Infrastructures peut allouer des subsides pour les travaux d’entretien et de restauration.”  Déi sougenannten «Molbeem» sinn zwar net onbedéngt alleguer ënnert «Arbres remarquables» ze klassifizéieren, ma et sinn oft ganz al Beem, déi deelweis iwwert e puer honnert Joer al sinn.

An deem Zesummenhang hu mir der Regierung dës Froe gestallt:

1. Wéivill Beem sinn den Ament als Arbres remarquables klassifizéiert? Wéivill Arbres remarquables sinn an de leschten 10 Joer, opgelëscht no Joer, offiziell als solch unerkannt ginn?

2. Wat ass säitens dem Ministère virgesinn, fir déi sougenannten «Molbeem» ze schützen ?

3. Wéi vill Molbeem sinn, Informatioune vum Ministère no, an de leschten 10 Joer verschwonnen ?

4. Wat sinn d’Strofen, déi virgesi sinn, wann een onerlaabt ee Molbam fort mécht ?

5. Ass virgesinn, d’Uplanze vun traditionelle Louhecke staatlech ze fërderen ? Wa jo, ënnert wéi enger Form a ginn et do well Pilotprojeten ?

6. Sinn Hëllefe virgesinn, fir Bëschbësëtzer finanziell ënnert d’Äerm ze gräifen, wann se ofgestuerwe Molbeem ze ersetzen ?

Verlaf an der Chamber

QP Nummer 2556

“Net ouni meng Mask”, dëst war der Numm vun der Werbecampagne, déi de Gesondheetsministère fir ronn eng Millioun Euro opstelle gelooss huet. Wéi d’Ministere mir a menger Fro n°2333 äntweren, gouf eng Firma domadder beopdrot, dës Campagne ze realiséieren. Opfälleg ass, dass dës Firma direkt Verbindunge mat mindestens enger vun de Regierungsparteien huet. 

An deem Zesummenhang hu mir der Regierung dës Froe gestallt:

1. Wéi verdeelen sech déi 1.132.263,38€ Ausgaben op • d’Konzeptioun? • d’Diffusioun? • d’Publicitéit? • d’Kommissioun vun der Agence?

2. Kann d’Regierung confirméieren, datt et sech bei dëser Agence ëm eng Firma handelt, déi an der Walcampagne 2018 vun der d’LSAP Opträg krut? (Quell: https://www.adada.lu/2018/12/michel-strotz-et-karim-youssef-creent-lagence-neon-marketing-technology/)

3. Firwat krut grad dës Firma den Optrag vun der Regierung? 

4. Ugesiichts den aktuellen Informatiounen, wéi schléisst d’Regierung aus, dass et zu Favoritismus an dësem Fall komm ass?

Verlaf an der Chamber

QP Nummer 2548

A virege parlamentaresche Froen un de Mëttelstandsminister hunn ech verschidden Informatiounen zu der Online-Plattform “Letzshop” geliwwert krut. An der Äntwert op d’Fro n°2176 huet de Minister ënnerstrach, dass d’Plattform wärend der Covid-19-Pandemie immens gewuess ass. Dëst ass natierlech engersäits de klenge Geschäfter zegutt komm, déi trotz zouenen Diere weider hier Produite konnte verkafen an doduerch hier Verloschter konnte minimiséieren.  Doriwwer eraus hunn och Restaurateure probéiert hier Produiten iwwert dës Plattform unzebidden, wéi de Minister a senger Äntwert op meng Fro n°2252 wësse léisst:  “”Als einfachst logistesch Léisung, déi direkt kann ëmgesat ginn, kann een op Letzshop.lu de Click&Collect ubidden, d.h. de Client kann seng online Bestellung direkt am Betrib ofhuelen. Vereenzelt Betriber hunn dës Léisung schonn ëmgesat.” ”

An deem Zesummenhang hu mir der Regierung dës Fro gestallt:

1. Wäert de Minister an noer Zukunft een direkte Liwwerservice fir Restauranten op Letzshop ubidden an dësen op letzshop.lu hosten (z.B. ënnert der Subdomain horesca.letzshop.lu)? Falls jo, kann hien weider Erklärunge liwweren, wéi dëse wäert funktionéieren?

Verlaf an der Chamber

QP Nummer 2517

Eng Fro gouf gestallt op fro.lu.

Verschidde Ministèren verschécken mëttlerweil Bréiwer, op deenen ee QR-Code um Blat opgedréckt ass. Wien versicht de QR-Code fir eng Echtheetsprüfung bei gouvcheck.lu ze notzen, dee gëtt enttäuscht, well de QR-Code op dëser Plattform als “invalid” erkannt gëtt. Beim Dekodéiere vun de QR-Coden fënnt een allerdéngs verschidden Informatiounen. Beim Bréif fir d’Verdeele vun de gratis Masken aus dem Juni 2020 fënnt een zum Beispill, datt de QR-Code den Numm “Data_Matrix” dréit an d’Coden op all Säit vum Bréif ënnerschiddlech sinn. D’QR-Coden variéieren doriwwer eraus jee no Destinatär vum Bréif.

An deem Zesummenhang hu mir der Regierung dës Froe gestallt:

1. Wat genee beinhalt dee Marquage vu ministerielle Bréiwer? Beinhalt de QR-Code perséinlech Donnéeën? Falls jo, wéi eng an op wéi enger legaler Basis ginn se erhuewen a wat ass d’Verbindung tëschent dem QR-Code an de perséinlechen Donnéeën?

2. Kéint mat dësem QR-Code ee Suivi gemaach ginn, zum Beispill am Kontext vun der Verdeelung vun de Masken, wien seng Maske siche war a wien net?  

Fro n°2494

Iwwert fro.lu gouf eis eng Fro gestallt, déi mir als Question Parlementaire mat an d’Chambre huelen. Wann och iech eppes um Häerz leit an dir eng Fro un d’Regierung hutt, da stellt eis är Fro. Einfach laanscht surfen op www.fro.lu

Verlaf an der Chamber

QP Nummer 2494

A menger parlamentarescher Fro n°841 hat ech de Landwirtschaftsminister gefrot, wat wärend der Hëtztwell de leschte Summer am Beräich vun den Déierentransporter ënnerhol gouf. D’EU-Reglement 1/2005 gesäit jo verschidde Konditioune fir Déierentransporter vir an och wéi dës organiséiert musse sinn, fir d’Wuel vun de Déieren ze garantéieren.  A senger Äntwert hat de Minister geschriwwen: “”Wat elo déi auslännesch Transporter betrëfft, déi am Transit duerch eist Land fueren, ginn dës Kontrollen vun der Douane respektiv der Police duerchgefouert. Et handelt sech hei ëm Routineskontrollen déi bei Camionen duerchgefouert ginn oder spezifesch Kontrollen déi sech op Déierentransporter konzentréieren.  Wat elo déi lescht Woch mat héijen Temperaturen betrëfft, si keng spezifesch Kontrollen duerchgefouert ginn an et sinn bei den normalen Kontrollen keng schwéierwigend Mängel opgefall.””

An deem Zesummenhang hu mir der Regierung dës Froe gestallt:

1. Wéi vill Kontrolle goufen an de Summerméint 2019 vun der Police, der Douane an der Veterinärsinspektioun am Beräich vun den Déierentransporter duerchgefouert? 

2. Eist Déiereschutzgesetz gesäit a sengem Artikel 17 (2) Punkt 4 eng Strof vun 251 bis 200000 Euro an/oder 8 Deeg bis 3 Joer Prisong vir, fir déijéineg, déi bei engem Déierentransport d’Sécherheet an d’Wuelbefanne vun den Déiere mëssuechten. Géint wéi vill Persounen a Societéite ass dës Strof insgesamt schonns ausgesprach ginn? 

3. Mam Summerufank stinn déi nächst Hëtztwelle sécherlech virun der Dier. Wéi eng Mesurë wäert de Landwirtschaftsminister ënnerhuelen, domat d’Temperature an den Déierentransporter fir d’Déieren agreabel bleiwen, wann se vun, op oder duerch Lëtzebuerg fueren?

4. Ass geplangt, erëm Restriktioune bei den Déierentransporter anzeféieren, falls d’Temperature méi wéi 35 Grad erreechen? Falls jo, wat genee ass geplangt?

5. A senger Äntwert hat de Minister iwwerdeems geschriwwen: “”Wat d’Transporter am Transit betrëfft, ass et ganz schwiereg déi ze verbidden aus dem Grond well mir keng Opfaangstrukturen, sougenannt “points d’arrêt” hei zu Lëtzebuerg hunn wou déi Déieren kënnen ofgelueden an mat Fudder an Waasser versuergt ginn.”” Ugesiichts, datt d’Regierung ëmmer erëm betount sech fir ee staarken Déiereschutz anzesetzen an dem Fakt, dass vill Camione wéinst dem Tanktourismus de Wee iwwer Lëtzebuerg fueren,  1. firwat existéiert zum aktuellen Zäitpunkt nach keng esou Opfaangstrukturen op eisem Territoire?  2. Wat wär de Käschtepunkt fir esou eng Opfaangstrukturen installéieren? 3. Wäert d’Regierung esou Opfangstatiounen zu Lëtzebuerg opriichten oder opriichte loossen?

6. Wäert Regierung sech um europäeschen Niveau dofir asetzen, fir eng Maximaldistanz fir Déierentransporter anzeféieren? 

Verlaf an der Chamber

QP Nummer 2438

Lescht Woch gouf et an enger Fleeschfabrik bei Gütersloh an Nordrhein-Westfalen ee gréisseren Ausbroch vu Covid-19. Wéi verschidden däitsch Medien beriichten, solle ronn 1300 Mataarbechter sech mam Coronavirus infizéiert hunn a goufen ënner Quarantän gestallt (FAZ.de, 21.6.2020). D’Plattform Spiegel.de schreift an engem Artikel vum 15te Juni 2020 iwwert méiglech Covid-19-Infektiounen duerch réie Saumon a China fest:  “”Dabei scheint es aktuell eher wahrscheinlich, dass die Virenfunde auf dem Hackbrett darauf zurückzuführensind, dass der Fischhändler oder einer der Verkäufer mit dem Virus infiziert war und die Hygieneregeln nicht beachtet hat. Wenn etwa derjenige, der denLachs auf dem Brett zubereitet hat, mit Sars-CoV-2 infiziert war, könntenViren auf das Schneidebrett und auf denFisch gelangt sein. So wiederum könntensich die Betroffenen infiziert haben.”” Deemno kéint de Kontakt mat der Uewerfläch vu réie Liewensmëttel eng Source sinn, fir sech mam Covid-19 unzestiechen . Dëst implizéiert, datt d’Liewensmëttelchaîne, allem virun d’Aarbechter, déi an der Liewensmëttelkette mat frësche Wueren hantéieren, am Kader vun der Covid-19-Pandemie nach besser misste kontrolléiert ginn.

An deem Zesummenhang hu mir der Regierung dës Froe gestallt:

1. Goufen déi zwee Schluechthaiser zu Wecker an zu Ettelbréck schonns op de Covid-19 getest?

2. Goufen et schonns positiv Covid-19-Fäll an de béide Schluechthaiser zu Lëtzebuerg?

3. Wéi eng Erkenntnisser besëtzt d’Regierung vis-à-vis vun Infektiounen iwwert réi Liewensmëttel?

4. Goufen an der Liewensmëttelchaîne vu frësche Liewensmëttel weider präventiv Moossnamen géint d’Verbreedung vum Coroinavirus decidéiert? Falls nee, gëtt dëst fir d’Zukunft envisagéiert? 

5. Schaffen an de Schluechthaiser Aarbechter oder Saisonsaarbechter, déi hire feste Wunnsëtz net zu Lëtzebuerg oder an der Groussregioun hunn? Falls dës Leit positiv op de Covid-19 getest ginn, ginn si dann an hir Heemecht zeréckgeschéckt oder kommen si heihinner a Quarantän? Falls se hei a Quarantän mussen, wou mussen dës Läit hin?

Verlaf an der Chamber

QP Nummer 2433

Den neie Luxair-Chef huet an engem Interview am Lëtzebuerger Wort vum 10te Juni 2020 d’Kuerzstreckeflich als “Zubringerdienst” definéiert: “Man kann Flüge nach Frankfurt oder Paris als Kurzstrecke sehen, doch zumeist sind diese Flüge „Zubringerdienste“ zu ferneren Zielen. Das sollte nicht infrage gestellt werden. […] Aber kaum jemand fliegt mit uns zum Charles-de-Gaulle, um einen Paris-Bummel zu machen, sondern sie steigen dort um und fliegen weiter. ” De Mobilitéitsminister hat mir op meng mëndlech Fro n°102 an der Chamber geäntwert, dass him d’Iddi, géint Kurzstreckeflich virzegoen, sympathesch wär an een sech op EU-Niveau dofir asetze misst. Och d’Ëmweltministesch hat schonns an engem RTL-Interview vum 3te Juni gesot, datt een hei am Land kéint de Wee goen, keng Kuerzstreckeflich méi unzebidden, fir déi et gutt Zuchverbindunge ginn.

An deem Zesummenhang hu mir der Regierung dës Froe gestallt:

1. Deelt d’Regierung d’Differenzéierung vum Luxair-Chef, dass ee bei Kurzstreckeflich tëschent Zubringerdienst a City-Trips ënnerscheede muss? 

2. Sinn d’Ministeren der Meenung, eng d’Zuchverbindung enger Fluchverbindung soll virgezu ginn, och wann et sech ëm een Zubringerdienst handelt?

3. Wéi eng lëtzebuergesch Fluchstrecke sollten an den Ae vun de Ministere ganz ewech falen? Bis wéini sollen dës Strecken ewechfalen?

4. Ugesiichts, datt d’EU-Parlament de Klimanoutstand ausgeruff huet an d’Klimaneutralitéit bis d’Joer 2050 freet, wäert d’Regierung op EU-Niveau agéieren, fir Kurzstreckeflich ze verbidden? Falls jo, wat hunn d’Ministeren hei konkret vir?

5. Wéi gedenkt Regierung generell géint de Präisdumping am Low Cost ze handelen?

Verlaf an der Chamber

QP Nummer 2391

D’Regierung huet decidéiert de Kaf vu Vëloen zu Lëtzebuerg méi ze subventionéieren. Iwwert de Klimafong gëtt de Kaf vun engem neie Vëlo mat bis zu 600 Euro ënnerstëtzt. Wéi de Mobilitéitsminister op RTL erkläert huet, fueren dausende Leit pro Dag mam Vëlo. Et handelt sech – an de Wieder vum Minister – ëm ee reegelrechte Boost, deen ee wëll begleeden an d’Zäit wär elo do, fir et ze maachen.

An deem Zesummenhang hu mir der Regierung dës Froe gestallt:

1. Wéi vill Leit hu vun der erhéichter Primm fir Vëloe profitéiert?

2. Um Site vu Myenergy steht geschriwwen: “Achat du cycle entre le 11 mai 2020 et le 31 mars 2021 (date de la facture acquittée)” Ugesiichts, datt schonns Persounen virun der Erhéijung vun der Primm bereet waren, sech een neie Vëlo zouzeleeën, wäerten déi Läit, déi fir 2020 eng Rechnung virléeë kënnen, och vun der erhéijter Primm profitéiere kënnen a retroaktiv Sue rembourséiert kréien?

3. Ass, am Hannergrond vun der Fërderung vun enger zirkulärer Wirtschaft, geplangt, d’Primm och fir Secondhand-Vëloen auszewäiten?

4. Wéi vill Vëloe sinn zënter 2013 (opgelëscht no Joer) beim Staat ugeschaaft ginn? Wéi vill Kilometer mam Auto konnten doduerch insgesamt agespuert ginn? Wéi vill CO2-Emissioune konnten doduerch agespuert ginn?

5. A menger parlamentarescher Fro n°1915 hunn d’Ministere mir geäntwert, dass d’Regierung sech zum Zil gesat huet de gesamte Fuerpark vun der Regierungsmembere mëttelfristeg total CO2-emissiounsfräi ze kréien. Wat fir een Zäitraum versteet d’Regierung ënnert dem Begrëff “mëttelfristëg”?

6. Wäert d’Regierung an deene nächste Méint een Deel vun hiere Limousinnen duerch Vëloen ersetzen?  • Falls jo, wéi vill Limousinne sollen duerch Vëloen ersat ginn?  • Falls nee, firwat net? 

7. Wéi vill Ministeren si bereet hier Limousinnen an noer Zukunft ofzeginn an, am Kader vun hierem Mandat, nëmmen nach mam Velo a mam ëffentlechen Transport ze fueren?

Verlaf an der Chamber

QP Nummer 2354

D’Gesetz 25 Mee 2011 reegelt an de grousse Linnen d’Aspekter vun der Juegd. Beim Duerchliese vum Text fält op, dass am Gesetz wéineg Dispositiounen zu der Juegd vun engem Héichsëtz aus existéieren. Ausser dem Artikel 10 wou vun der “chasse à l’affût” rieds ass, fënnt een am Gesetz näischt zu de Bestëmmunge vun den Héichsëtzer. 

An deem Zesummenhang hu mir der Regierung dës Froe gestallt:

1. Wéi vill Héichsëtzer ginn et insgesamt am Land?

2. Wéi eng Autorisatioun muss ee Jeeër ufroen, fir esou een Héichsëtz kënnen opzeriichten? Kann een Héichsëtz egal wou opgebaut ginn?

3. Ginn et technesch Bestëmmungen, wéi een Héichsëtz muss opgebaut sinn?

4. Wéi mussen d’Héichsëtzer verséchert sinn an op wien trëfft d’Responsabilitéit, wann aner Leit duerch den Héichsëtz zu Schued kommen?

Verlaf an der Chamber

QP Nummer 2342

Net ouni meng Mask. Dëst ass de Message vu enger aktueller Sensibiliséierungscampagne, déi vum Gesondheetsministère bal iwwerall am Land ze gesinn ass. Pechbiller a Restauranten souwéi digital Werbeannoncë sollen d’Leit dorunner erënneren, dass si mam Droe vun enger Mask hier Matmënschen a sech selwer virun enger méiglecher Infektioun mam Coronavirus schütze kann.  Wann een d’Metadate vun de Grafiken analyséiert, déi d’Santé zur Verfügung stellt, sou entdeckt een, dass d’Date de Création vun der Grafik de 17te Mäerz 2020 war. Zu dësem Datum hat d’Regierung knapps de Confinement decidéiert. Gläichzäiteg war d’Regierung zu dem Zäitpunkt skeptesch géigeniwwer der Schutzwierkung vu Masken, well dës net medezinesch noweisbar war. 

An deem Zesummenhang hu mir der Regierung dës Froe gestallt:

1. Wéini gouf d’Werbecampagne an och d’Grafik #NetOuniMengMask, déi haut iwwerall ze gesinn ass, vun der Regierung an Opdrag ginn? 

2. Gouf et eng ëffentlech Ausschreiwung fir dës Werbecampagne?

3. Kann d’Ministesch confirméieren, dass d’Date de Création vun der Grafik de 17te Mäerz ass? Falls jo,  • firwat gouf d’Droe vun der Mask zu deem Zäitpunkt net schonns als Recommandatioun ausgeschwat? • hat d’Regierung hei bewosst net d’Wourecht gesot, well een eng Panik innerhalb vun der Bevëlkerung vermeide wollt, wëssend, datt et zu deem Zäitpunkt schwéier war Masken um fräie Marché ze kréien?

4. Wéi vill huet d’Konzeptioun vun der Werbecampagne kascht? 

5. Wéi vill bezilt d’Regierung fir d’Diffusioun an d’Publicitéit vun der Campagne?

6. Wéi eng Organisatioun huet d’Werbecampagne konzipéiert an designed?

Verlaf an der Chamber

QP Nummer 2333