Parlamentaresch Froen
Nohaltëg Investitiounen vum Pensiounsfong
Virun de Walen war d’Steierdebatt ee vun den Haaptthemen an der politescher Aktualitéit. D’Aktualitéit vun der Steierreform gouf awer, zënter dem Untrëtt vun dëser neier Regierung, vun der Pensiounsdebatt ofgeléist, obwuel et an de Walen wéineg bis guer keen Thema war. Een Thema, wat beim Pensiounsfong an de leschte Joren virun allem behandelt gouf war, wéi d’Suen vum Fong sollen investéiert ginn. Iwwert 20 Milliarden Euro gi vum Pensiounsfong verwalt. An der Vergangenheet gouf et Kritik, dass d’Suen a schiedlech Projeten investéiert ginn, dorënner zum Beispill Atomenergie oder d’Waffenindustrie. D’Ministesch schreift an der Äntwert op eng parlamentaresch Fro n°434, dass haut 100% vun de Mandater vum Pensiounsfong mat engem nohaltëgen Usaz verwalt ginn. An engem Artikel op rtl.lu vun haut gëtt beriicht, dass de Pensiounsfong an Zukunft erëm an 18 Societéiten dierf investéieren, dorënner beispillsweis Rëschtungskonzerner ewéi Rheinmetall AG oder Hensoldt.
An deem Zesummenhang hu mir der Regierung dës Froe gestallt:
Wéi kënne déi Leit maachen, déi net domadder averstane sinn, dass hir Cotisatiounen a Rëschtungskonzerner investéiert ginn?
Wéi stinn d’Ministesch an d’Regierung zu engem System, an deem de Bierger selwer bestëmme kann (zum Beispill mat engem Klick op myguichet.lu), ob de Pensiounsfong seng Cotisatiounen an ethesch a klimafrëndlech Projeten investéiert oder net?
QP Nummer 1991
