Op der Internetsäit vun der Weltgesondheetsorganisatioun (OMS) gëtt di sexuell Gesondheet wéi folgt definéiert :
« La santé sexuelle fait partie intégrante de la santé, du bien-être et de la qualité de vie dans leur ensemble. C’est un état de bien-être physique, émotionnel, mental et social en relation avec la sexualité, et non pas simplement l’absence de maladies, de dysfonctionnements ou d’infirmités. La santé sexuelle requiert une approche positive et respectueuse de la sexualité et des relations sexuelles, ainsi que la possibilité d’avoir des expériences sexuelles agréables et sûres, sans contrainte, discrimination et violence. Pour atteindre et maintenir un bon état de santé sexuelle, les droits sexuels de tous les individus doivent être respectés et protégés.
International unerkannten Studien no ass all zweete Mann am Laf vu sengem Liewen eng Kéier vun Erektiounsstéierungen betraff. De Pourcentage u Männer, déi reegelméisseg vum Problem concernéiert sinn, läit – ënnert anerem ofhängeg vum Alter – tëscht 5 an 15 %. D’Grënn fir dës erektil Stéierungen sinn diverser Natur. Handfest Erkrankungen, wéi zum Beispil kardio-vaskulär Problemer, Diabetes oder Depressiounen kënnen zu der genannter Pathologie féieren. Och Patienten, déi staark Medikamenter anhuelen, oder Mënschen, déi ënner Stress leiden oder staarke psychesche Belaaschtungen ausgesat sinn, kënne vun Erektiounsstéierungen betraff sinn.
D‘ „Erektil Dsyfunktioun“ ass en Tabuthema. Leider bréngt se eng ganz Partie Leit an eng schwéier Situatioun. Fir vill Mënschen, déi gesondheetlech Problemer hunn, ass eng Erektiounsstéierung net nëmmen e weidert Symptom, et ass villméi een Accélérateur, deen di bestoend Problemer nach zousätzlech verstäerkt. Oft fillen sech déi Betraffen mat hirem Problem eleng gelooss a se schummen sech driwwer ze schwätzen, sief et mat hirem Liewenspartner oder mat engem Dokter.
Aktuell ginn Medikamenter zur Behandlung vun enger erektiler Dysfunktioun vun der Krankekeess net rembourséiert. En Titre de prise en charge ass eenzeg iwwert eng motivéiert Ordonnance vum Dokter an engem uschléissenden Contrôle médical duerch en Dokter vun der Krankekeess méiglech.
Huet den Här Minister Schneider virgesinn, Patienten a Patientinnen mat de genannte Problemer verstäerkt ze ënnerstëtzen an d‘Thema Erektiounsstéierungen méi ze thematiséieren, voire ze enttabuiséieren?
Firwat, Här Minister, ginn aktuell d‘Medikamenter zur Behandlung vun enger erektiler Dysfunktioun net vun de Krankekeesen rembourséiert? Ass virgesinn d‘Liste positive des médicaments unzepassen? Wann nee, firwat net? Wann jo, wéien Taux de Remboursement ass do virgesinn?
Ginn et Donnéeën säitens dem Ministère, déi konkret Zuelen liwweren kéinten, wéi vill Biergerinnen a Bierger zu Lëtzebuerg vum Problem betraff sinn?
