Ëmsetzung vum Integratiounsplang

Veröffentlicht am Juli 19, 2019

De Nationale Plang fir Integratioun (Pan intégration) ass den 13te Juli 2018 am Regierungsrot ugeholl ginn. D’Zil vun dësem Plang ass et déi sozial Kohäsioun tëscht Lëtzebuerger a Net-Lëtzebuerger, dorënner falen och d’Flüchtlingen, hei am Land ze stäerken. Ausser der Existenz vun de grousse Linnen sinn bis haut awer nach keng Eenzelheeten zur Ëmsetzung vum PAN intégration bekannt. 

An deem Zesummenhang wéilt ech de Ministeren dës Froe stellen:

  1. Wéi eng Virdeeler bréngt de Nationale Plang fir d’Integratioun op kommunalen a nationalen Niveau fir DPI’en a BPI’en mat sech?
  2. Wéi eng Roll spillen d’Office sociaux an der Ëmsetzung vum PAN Integratioun? Wéi eng exakt Aufgaben faallen den offices Sociaux aus den Aktiounsdomäner vum PAN intégratioun zou? Wéi ginn d’Offices sociaux bei dësen Aufgaben vum Ministère ënnerstëtzt?
  3. Am Budget 2019 gëtt de Nationale Plang fir d’Integratioun mat 2,5 Milliounen Euro dotéiert. Wéi eng Projete solle mat dëse Sue finanzéiert ginn? Goufe schonn Appel à projets lancéiert? Falls jo, wéi eng sinn dat a wat sinn d’Zäitfristen? 
  4. Ass d’Regierung der Meenung, dass de LISKO den adaptéierten Outil ass fir d’Begleedung an d’Integratioun vun de BPI’en?
    • Falls jo, wat ass den zentrale Schwéierpunkt vun dësem Service ? 
    • Wéi eng finanziell, personell a materiell Ressourcë stinn dem LISKO zur Verfügung?  
      • Wéi eng vun dëse Ressourcë ginn dem LISKO am Kader vun der Konventioun mam Ministère bereetgestallt?
      • Ass d’Regierung der Meenung, dass des Ressourcë fir d’Erfëlle vun de Missioune vum LISKO duer ginn? 
    • Ass d’Madamm Ministesch der Meenung, dass eng Dezentraliséierung beim LISKO ubruecht wär?
  5. Ass d’Madamm Ministesch der Meenung, dass d’Zesummenaarbecht tëscht den Acteuren, déi an der Integratioun schaffen, verbessert kéint ginn? 
    • Falls jo, wéi kann een d’Kommunikatioun tëscht dem OLAI (oder der spéiderer ONA), dem LISKO, den Office Sociaux an aneren Intervenant’en verbesseren? 
    • Wéi steet d’Regierung zur Iddi fir de Comité interministériel, den am Artikel 6 vum Integratiounsgesetz virgesinn ass, ze erweideren a Vertrieder vun der Zivilgesellschaft mat eran ze huelen?
PDF vun der FroHerunterladen
ÄntwertHerunterladen

Gëtt d’sexuell Orientéierung a staatlechen Datebanken opgefouert?

Veröffentlicht am Juli 18, 2019

Am Kader vun eisen Investigatiounen iwwert d’Datebanke beim Staat (Parlamentaresch Fro vum Sven Clement) hu mir spezifesch nach wollte wëssen, ob an iergendenger vun den Datebanken Donnéeën iwwert déi sexuell Orientéierung beim Staat virkommen a falls jo, ob dëst vu Noutwennegkeet ass.

Hei ass eis Fro:

D’Piraten hunn an der parlamentarescher Ufro n°880 d’Regierung gefrot, wéi eng Datebanken insgesamt beim Staat existéieren a wéi eng Donnéeën hei gespäichert ginn. Et ass mir awer een Uleies komplementär dozou an am Kader vun den LGTBIQ-Rechter ze froen, ob an iergendenger vun den Datebanken beim Staat Donnéeën iwwert d’sexuell Orientéierung vun den agedroene Persounen opgefaasst sinn. 

An deem Zesummenhang wéilt ech de Ministeren dës Froe stellen:

  1. Ginn et Datebanken beim Staat, an deenen d’sexuell Orientéierung vun den agedroene Persounen als Kategorie opgefaasst ass? Falls jo, a wéi engen Datebanken ass dëst de Fall? 
  2. Falls Informatiounen iwwert d’sexuell Orientéierung vu Persoune an staatlechen Datebanke existéieren, ass d’Regierung der Meenung, dass d’Späichere vun dësen Informatiounen an ëffentlechen Institutiounen an Administratiounen vu Relevanz a Noutwennegkeet ass?
    • Falls jo, a wéi enge Fäll ass d’Späichere vun dësen Donnéeë relevant a noutwenneg?
    • Falls nee, ass d’Regierung bereet eng Revisioun vun allen Datebanken duerchzeféieren an d’Informatiounen, déi op eng sexuell Orientéierung hindeiten, ze läschen?
PDF vun der FroHerunterladen
ÄntwertHerunterladen

Sinn E-Sports onbedenklech?

Veröffentlicht am Juli 18, 2019

D’Regierung wëll dës Legislatur d’Entwécklung vum E-Sports-Sektor an Ugrëff huelen. D’Piraten ënnerstëtzen dëst Virhuelen, ginn awer ze bedenken, dass een och potenziell Geforen virbeugt. An asiatesche Länner, wou den E-Sports-Beräich immens entwéckelt ass, sinn gläichzäiteg d’Unzuel fir Suchtbehandlungen an der Computerspillsucht an d’Luucht geschoss. Mir hunn d’Regierung zu dësem Thema e puer Froe gestallt:

Am Koalitiounsaccord steet geschriwwen, dass d’Regierung ee legale Kader fir E-Sports opstelle wäert an dozou déi sozial a wirtschaftlech Froen betreffend dëser neier Sportsdisziplin analyséiert solle ginn. An dem Kontext sollt awer och d’Gesondheet an d’Bildung an dësem Beräich net vernoléissegt ginn, speziell wat d’Computerspillsucht ubelaangt. Den Gaming Disorder ass 2018 am International Classification of Diseases (ICD-11) als Krankheetsbild unerkannt ginn a no enger Studie vun der Pädagogischen Hochschule Heidelberg sollen tëscht 4 an 8 Prozent vun de Jugendlechen weltwäit dovunner betraff sinn. Europäesch Etuden situéieren d’Prävalenz bei Jugendlechen och ronderëm 4%. Zu Lëtzebuerg ginn et awer aktuell keng offiziell Zifferen, déi iergendwéi d’Computerspillsucht méisst.

Zesummegefaasst betruecht muss d’Fërderung vum E-Sports mat enger Suchtpräventioun- a behandlung Hand an Hand goen. Hei ass d’Regierung, sou wéi et mir zougedroe gouf, wéineg virbereet. Virun allem an der  Computerspillsuchtbehandlung ginn et zu Lëtzebuerg keng adequat Léisungen mat der Konsequenz, dass een d’Patienten fir Behandlungen an d’Nopeschlänner schéckt.

An deem Zesummenhang wéilt ech de Ministeren dës Froe stellen:

  1. Vu, dass d’Computerspillsucht (ICD-11) zu Lëtzebuerg nach net am Diagnoseschlëssel existéiert, mat wéi engen Moosinstrumenter mësst de Gesondheetsministère d’Fäll vun Computerspillsüchtegen zu Lëtzebuerg? 
    • Falls keng Donnéeë virleien, gesäit de Gesondheetsminister d’Noutwennegkeet fir d’Computerspillsucht an d’Nomenklautura vun den Diagnosen opzehuelen? 
    • Falls nee, firwat net?
  2. Wéi vill Sue sinn, opgeschlësselt pro Joer säit 2014, am Beräich vun der Computerspillsuchtbehandlung an d’Primär- souwéi d’Sekundärpräventioun vu Computerspillsucht investéiert ginn? Wéi eng Projekter goufen heibäi ënnerstëtzt?
    • Falls keng Donnéeë virleien, gesäit de Minister fir Sozialversécherung d’Noutwennegkeet fir d’Computerspillsucht an d’Nomenklautura vun der CNS opzehuelen? 
    • Falls nee, firwat net?
  3. Ass d’Regierung der Meenung, dass d’Computerspillsucht aktuell ee Problem ass oder an Zukunft zu Problemer kéint féieren? 
    • Falls jo,
      • mat wéi enge Geforen a Risiken ass an Zukunft ze rechnen?
      • mat wéi enge Mesure wäert d’Regierung dëse Geforen a Risiken entgéintwierken?
    • Falls d’Regierung nach keng Stellung zur Computerspillsucht huet, wéi eng Etüde gedenkt si dozou an Zukunft ze realiséieren an ab wéini?
  4. A wéi engem Ëmfang ënnerstëtzt d’Regierung lëtzebuergesch ASBLen, déi am Beräich vun der Computerspillsuchtbehandlung aktiv sinn? Wéi eng weider Projekter si vum Gesondheetsministère an dësem Beräich virgesinn?
PDF vun der FroHerunterladen
ÄntwertHerunterladen

Gemengepublikatiounen als politesch Bühn?

Veröffentlicht am Juli 17, 2019

Hei ass eis Fro:

Verschidde Gemengen hei am Land verschécken un d’Awunner vun hire Gemenge Communiquéen a Form vun Zäitschrëften oder Flyere fir hir Awunner iwwert d’Aktualitéit vun hirer Gemeng um Stand ze halen. Dës – mat Steiergelder bezuelte – Publikatioune ginn a verschiddene Gemenge gären als politesch Bühn genotzt fir esou déi politesch Responsabel an ee bessert Liicht ze stellen. An de Publikatiounen tauchen ëmmer nees déi selwecht Gesiichter op de Fotoe op, d’Berichterstattung weist tendenziéis d’Meenunge vun de Majoritéiten an net all Aspekter vu politeschen Dossiere ginn onofhängeg an onparteilech duergestallt.

Mir wëllen dofir vun der Inneministesch wëssen, ob dat Problem bekannt ass an ob een Intressi besteet hei virzegoen:

  1. Erkennt d’Regierung d’Gefor, dass d’Publikatioune vun de Gemengen fir politesch Meenungsmaach vu verschiddene politesche Verantwortleche mëssbraucht kéinte
    ginn? Ass d’Regierung aktuell zefridde mat der Situatioun oder gesäit si ee Besoin zum Handelen an dësem Thema?
  2. Existéiert fir Publikatiounen een Deontologieskodex, un deen sech d’Gemengen hale mussen? Falls nee, gedenkt d’Regierung esou ee Kodex opzestellen? Falls, nee, firwat net?
  3. Ass d’Regierung der Meenung, dass kloer Reegelen, wéi zum Beispill d’Imposéiere vu Formater a Richtlinnen, een Abus vun ëffentlech bezuelte Publikatioune kënne
    virbeugen?
PDF vun der FroHerunterladen
ÄntwertHerunterladen

Wéini kënnt d’Biopoubelle um nationale Plang?

Veröffentlicht am Juli 16, 2019

D’Chamber hat de 16 Mee 2019 am Kader vun der Debatt zum Klima eng Motioun adoptéiert fir d’Regierung opzeruffen alles ze ënnerhuele fir Lëtzebuerg zum Spëtzereider an der Offallvermeidung an Offallverwäertung ze maachen. Um Punkt 10 gëtt d’Regierung invitéiert “à assurer à ce que les collectes séparées obligatoires depuis 1994 soient mises en place partout au Luxembourg”. 

Dee gläichen Dag gouf eng Motioun vun de Piraten ofgeleent, déi ee konkreten Datum fir d’Aféiere vun enger grénger Poubelle am ganze Land gefuerdert hat, ënnert dem Virwand, dass de Punkt 10 vun der adoptéierter Motioun dëst géif virgesinn. D’Motioun nennt awer keen Datum bis wéini dës Mesurë mussen ëmgesat ginn.

An deem Zesummenhang wéilt ech de Ministeren dës Froe stellen:

  1. Wéi vill Gemenge bidden aktuell zu Lëtzebuerg eng Gréng Poubelle un? Wéi vill Gemenge bidden nach keng gréng Poubelle un?
  2. Fir wéi een Datum plangt d’Regierung eng landeswäit d’Collecte vun organeschem Offall? Wéi wäert d’Regierung bei dësem Projet virgoen?
PDF vun der FroHerunterladen
ÄntwertHerunterladen

An d’Vakanz mam Nuetszuch?

Veröffentlicht am Juli 15, 2019

An d’Vakanz mam Nuetszuch aplaz mam Fliger? Déi Gréng hunn et an hirem EU-Wahlprogramm proposéiert, d’Realitéit zu Lëtzebuerg gesäit aneschters aus. Op Nofro am CFL Call Center gëtt ee gewuer, dass d’Offer an Europa ëmmer manner gëtt, well Nuetszich sech finanziell net lounen.

Mir wëlle vun der Regierung wëssen, wat hir Positioun zu Nuetszich ass an ob dës interessant Iddi hei ëmgesat gëtt. Hei ass eis Fro:

Am EU-Wahlprogramm 2019 vun Déi Gréng goufen d’Nuetszich tëscht den europäesche Metropolen als eng Transportalternative ugeduecht fir den Transportverkéier vum Fliger op d’Schinn ze dirigéieren. Eng besser Ausnotzung vum europäesche Schinnereseau zu Nuetszäiten kéint een Ureiz sinn fir de Loftpassagéierverkéier op d’Schinn erofhuelen. An eisen europäesche Nopeschlänner existéieren aktuell eng Réi Zuchlinnen fir Nuetszich.

An deem Zesummenhang wéilt ech de Ministeren dës Froe stellen:

1. Wéi vill Nuetszich sinn pro Joer säit 2013 am Passagéierverkéier Lëtzebuerg circuléiert, dëst opgelëscht no outbound (vu Lëtzebuerg an d’Ausland), inbound (aus dem Ausland op Lëtzebuerg) a national (um lëtzebuergeschen Territoire)?

2. Ass d’Regierung der Meenung, dass Nuetszich eng nëtzlech Alternative fir dat aktuell Transportwiesen duerstellen? Falls jo, wäert d’Regierung d’Erweiderung vun de Nuetszich an dëser Legislaturperiod unzilen? Kann de Minister an dem Fall präziséieren, wéi eng Etüden heizou scho virleien a wéini hien gedenkt mam Projet unzefänken? Falls nee, firwat net?

3. Ass d’Regierung der Meenung, dass d’Nuetszich eng ekologesch sënnvoll Alternativ zu Flich duerstellen? Falls jo, firwat?

4. Gedenkt d’Regierung Nuetszich duerch Subventioune präislech méi attraktiv ze gestalten?

5. Gouf et am Kader vun de Reunioune mat de Benelux-Länner souwéi de Memberstaaten an der Groussregioun schonns Diskussioune ronderëm d’Thema Nuetszich? Falls jo, wat ass de Stand vun den Diskussiounen a wéi gëtt weider verfuer? Falls nee, wäert d’Regierung dëst Thema an déi nächst Reunioune mat abauen?

Mat déiwem Respekt,
Marc Goergen
Député

PDF vun der FroHerunterladen
Äntwert vum MinisterHerunterladen

De Wollef zu Lëtzebuerg?

Veröffentlicht am Juli 10, 2019

Kréie mir de Wollef op Lëtzebuerg zeréck? Mir hunn d’Regierung gefrot, ob déi zoustänneg Administratioune schonn ee Plang hunn fir déi wëll Fauna erëm an eis Bëscher ze integréieren.

Déi europäesch Fauna huet an de leschte Jore fir e puer positiv Iwwerraschunge gesuergt. Wéi verschidde Medie beriichten, goufen an den Ardennen, net wäit vu Lëtzebuerg, Wëllef gesinn an am Pfälzerwald an Däitschland sinn am Kader vun engem Fërderprogramm vun der Europäescher Unioun och Luchsen ausgewëldert ginn. Dës Wëlldéiere goufen duerch de Mënsch bal vollkommen ausgerott. Ee Retour vu wëller Fauna wär fir déi lëtzebuergesch Biodiversitéit an d’natierlecht Gläichgewiicht vun der Natur sécherlech ee grousse Gewënn. 

An deem Zesummenhang wéilt ech de Ministeren dës Froe stellen:

  • Ass et am Interessi vun der Regierung, dass sech Déieren wéi de Luchs oder de Wollef erëm an der Lëtzebuerger Natur usidelen? Falls jo, wéi eng Mesurë wäert d’Regierung ënnerhuelen, fir dass dës Déieren sech kennen op eisem Territoire usidelen? Existéiert dofir schonn ee konkreten Aktiounsplang?
  • Am Kader vun der Bekämpfung vun der Schwéngspescht hat den Här Landwirtschaftsminister den Asaz vu Falen an der Zone blanche autoriséiert. 
    • Wéi sinn dës Falen fir Wëllschwäin konzipéiert?
    • Ween ass responsabel fir de Placement vun dëse Falen?
    • Wéi oft ginn dës Falen pro Dag kontrolléiert a vu wiem?
    • Kéinten dës Falen och Déieren erwëschen, déi net geziilt verfollegt ginn, zum Beispill Réi? 
    • Wéi kann d’Regierung garantéieren, dass nëmme Wëllschwäin an dës Falen geroden? Kann een zum Beispill ausschléissen, dass Hausdéieren an dës Fale geroden? 
PDF vun der FroHerunterladen
ÄntwertHerunterladen

Pabeierverbrauch an de Ministèren

Veröffentlicht am Juli 10, 2019

Mir wëlle wëssen, wéi vill Pabeier nach beim Staat zum Asaz kennt, wat dat kascht a wéi de Pabeierverbrauch reduzéiert soll ginn.

Hei ass eis Fro:

Här President,

Sou wéi den Artikel 83 vun eisem Chambersreglement et virgesäit, bieden ech Iech, dës parlamentaresch Fro un d’Ministere fir Emwelt, Klima a nohalteg Entwécklung, Finanzen & Administrativ Reform weiderzeleeden.

Wann een un bürokratesch Prozeduren denkt, denkt ee gären och un d’Ausfëlle vu Pabeier. Ee moderne Staatsapparat muss am digitalen Zäitalter allerdéngs “paperless” fonctionnéiere kënnen. Nieft dem Fakt, dass digital Inhalter mat engem normalen Internetzougang vun iwwerall aus disponibel sinn, ass et eleng schonn aus ekologesche Grënn sënnvoll Pabeier ze vermeiden, wou et méiglech ass. Pabeier an Tënt kaschte Suen an dofir ass ee responsabelen Ëmgang mat dëse Ressourcë Bestanddeel vun enger nohalteger Politik.

An deem Zesummenhang wéilt ech de Ministeren dës Froe stellen:

  • Wéi vill Suen hunn déi eenzel Ministèren zu Lëtzebuerg säit 2014 all Joer fir Pabeier ausginn? Wéi ass des Entwécklung ze beschreiwen?
  • Huet d’Regierung sech een Zil gesat, fir de Pabeierkonsum an de Ministèren an Zukunft ze reduzéieren? Falls jo, ëm wéi ee Montant (nominal an a Prozent) wëll d’Regierung de Konsum vu Pabeier an de Ministèrë par Rapport zu 2018 reduzéieren?

Mat déiwem Respekt,
GOERGEN Marc
Député

PDF vun der FroHerunterladen
ÄntwertHerunterladen

CO2-Verbrauch vu lëtzebuergesche Schëffer?

Veröffentlicht am Juli 8, 2019

D’lëtzebuergesch Schëffsflott beschränkt sech net eleng op d’Booter, déi op der Musel fueren, mee et gi Schëffer, déi ënnert lëtzebuergeschem Fändel an internationale Gewässer ënnerwee sinn. Mir wollte méi zu deene Booter an hirem CO2-Ausstouss wëssen.

Hei ass d’Fro:

Am Koalitiounsaccord huet d’Regierung versprach den CO2-Ausstouss an de nächste Joren ze reduzéieren. Fir dëst wichtegt Zil ze erreechen muss virun allem den Transportsecteur transforméiert ginn. Heirënner fält och d’lëtzebuergesch Schëfffaart, déi awer am Koalitiounsaccord keng allze grouss Beuechtung fënnt. D’Schëfffaart ass mat ee vun de Secteuren, déi weltwäit mat am meeschten um Ausstouss vun CO2, Stéckoxider a weidere schiedleche Gaser bäidréit. D’lëtzebuergesch Schëffsflott beschränkt sech net eleng op d’Booter, déi op der Musel fueren. Aktuell sinn och an internationale Gewässer eng Réi Schëffer, déi ënnert lëtzebuergeschem Fändel fueren, ënnerwee. 

An deem Zesummenhang wéilt ech de Ministeren dës Froe stellen:

  • Wéi vill Schëffer sinn aktuell am lëtzebuergesche maritime Register ageschriwwen? 
    • Wéi vill vun deene Schëffer  
      • hunn een Gewiicht bis 500 Tonnen?
      • hunn ee Gewiicht vun 501 bis 5000 Tonnen?
      • hunn ee Gewiicht vun 5001 bis 25000 Tonnen?
      • hunn ee Gewiicht vu méi wéi 25001 Tonnen?
  • Wéi vill Schëffer waren 2014, (no der selwechter Oplëschtung) insgesamt am lëtzebuergesche maritime Register ageschriwwen?
  • Wéi vill Stéierannaahmen huet Lëtzebuerg säit 2014 pro Joer mam Schëffsverkéier generéiert?
  • Besëtzt d’Regierung Donnéeën zum CO2 vun de Schëffer, déi am lëtzebuergesche maritime Register ageschriwwe sinn?
    • Falls jo, wéi huet sech den CO2-Ausstouss säit 2014 entwéckelt a wat sinn d’Grënn vun dëser Entwécklung?
    • Falls nee, wisou besëtzt d’Regierung keng Donnéeë zum CO2-Ausstouss vu Schëffer, déi ënnert lëtzebuergeschem Fändel fueren?
  • Wat fir eng Moossnamen wäert d’Regierung dës Legislatur ënnerhuelen, fir Schëffer, déi ënnert engem lëtzebuergeschem Fändel fueren, an d’Energie- an Ëmweltstrategie vum Koalitiounsaccord anzebannen an den CO2 Verbrauch vun dëse Schëffer ze reduzéieren?

Mat déiwem Respekt,
Marc Goergen
Député

PDF vun der FroHerunterladen
ÄntwertHerunterladen