Äntwert op eis Fro zu den Déierentransporter

De Landwirtschaftsminister Schneider huet eis eng Äntwert op eis parlamentaresch Fro iwwert d’Déierentransporter ginn.

D’Pirate bedaueren, dass während der Hëtztwell keng weider Kontrolle vum Minister ënnerhol goufen.

Des Weideren ass et ze belächelen, dass d’Déierentransporter an d’Tierkei wärend de Summerméint suspendéiert gi sinn. Mir si kategoresch géint Déierentransporter, déi dausende vu Kilometer vu Lëtzebuerg bis op d’EU-Baussegrenze an doriwwer eraus fueren.

Dofir géife mir eis vun der Regierung wënschen, am Déiereschutz weider Schrëtt ze goen an d’Déierentransporter endgülteg ze begrenzen. Et gëtt Zäit, och am Déierentransport lokal ze denken an d’Wuel vum Déier ze respektéieren.

Hei ass d’Dokument mat der Äntwert vum Minister.

Antfert-1

Et ass ze waarm fir Déierentransporter!

Wéinst den héijen Temperaturen hu mir dem Landwirtschaftsminister Romain Schneider eng dréngend parlamentaresch Fro gestallt, wéini en endlech gedenkt d’Déierentransporter zäitlech ze verbidden. Frankräich ass scho gëschter mam gudde Schrëtt virgaangen an huet d’Déierentransporter zäitweileg verbueden bis d’Temperaturen erëm erof ginn (Hei den Artikel).

Mir Pirate froen eis, wéi eescht des Regierung den Déiereschutz wierklech hëlt?

Hei ass eis QP:

Wéinst der Hëtztwell, déi momentan grouss Deeler vun Europa am Grëff huet, si vill Déierentransporter net an der Lag d’Konditioune vun engem aartgerechten Transport ze erfëllen, sou wéi en am Annexe I vum EU-Reglement 1/2005 virgesinn ass. Dëst mat schreckleche Konsequenze fir d’Wuel vun den Déieren. 

De franséische Landwirtschaftsminister huet aus dësem Grond all d’Déierentransporter op franséischem Territoire suspendéiert bis d’Temperaturen sech erëm an engem akzeptabele Beräich befannen.

An deem Zesummenhang wéilt ech de Ministeren dës Froe stellen:

  • Opgrond vun den extrem héijen Temperaturen, wéi vill Kontrolle bei Déierentransporter goufen dës Woch zu Lëtzebuerg ausgefouert? 
  • Bei wéi villen Transporter sinn ze héich Temperature festgestallt ginn? 
  • Wéi eng Strofe goufen doropshin ausgeschwat?
  • Wäert d’Regierung, ähnlech wéi Frankräich, een zäitlecht Verbuet vun Déierentransporter arrêtéieren bis d’Temperaturen sech erëm normaliséiert hunn? 
    • Falls jo, wou wäerten d’Déieren, déi op lëtzebuergeschem Territoire sinn, tëschenzäitlech versuergt ginn?
    • Falls nee, firwat net?