Wéini gëtt d’Bio-Poubelle endlech flächendeckend agefouert?

D’Chamber hat de 16te Mee 2019 am Kader vun der Debatt zum Klima eng Motioun adoptéiert alles ze ënnerhuele fir Lëtzebuerg zum Spëtzereider an der Offallvermeidung an Offallverwäertung ze maachen. Um Punkt 10 gëtt d’Regierung invitéiert “à assurer à ce que les collectes séparées obligatoires depuis 1994 soient mises en place partout au Luxembourg”. D’Motioun nennt awer keen Datum bis wéini dës Mesurë mussen ëmgesat ginn. Dee gläichen Dag gouf eng Motioun vun de Piraten ofgeleent, déi mam 1.1.2020 ee konkreten Datum fir d’Aféiere vun enger Bio-Poubelle am ganze Land gefuerdert hat an dat ënnert dem Virwand, dass de Punkt 10 vun der adoptéierter Motioun dëst géif virgesinn. 

Weiderliesen

Voll Bréifkëschten a vill Dreck – gehéiert Werbung an der Bréifkëscht ofgeschaaft?

Verschidde Stied an Holland hunn säit knapps engem Joer hir Quantitéiten u Pabeieroffäll duerch eng simpel Mesure reduzéiert, wéi verschidden Zeitungen am Ausland beriichten. Deemno kënnen Haushälter an Holland duerch een Opt-in decidéieren, ob si wëlle Werbung a Form vu Pabeier an hier Bréifboîte gehäit kréien. Dofir mussen si nëmmen op hirer Bréifboîte uginn, dass si Werbung erhale wëllen. All Werbung, déi net explizitt un eng Persoun adresséiert ass, däerf net ouni d’Averständnis vun der Persoun an d’Bréifboite geheit ginn. Entreprisen, déi sech net dorunner halen, kënne vun de Leit gemellt ginn a sinn da gezwongen héich Geldstrofen ze bezuelen. Duerch dës Mesure huet d’Stad Amsterdam, den Informatioune vum Site geo.deno, zirca 34 Kilo Offäll pro Haushalt pro Joer agespuert.

An deem Zesummenhang well ech dem Minister folgend Froe stellen:

  1. Wéi vill Kilo Ooffall, opgelëscht no Material (Pabeier, Plastik, etc.), entstinn zu Lëtzebuerg all Joer duerch Bréifboitewerbung?
  2. Wäert d’Regierung den hollännesche Wee matgoen an dofir suergen, dass Werbung iwwert de Postwée nëmmen nach iwwert een Opt-in kann ausgestallt ginn? Falls jo, ab wéini? Falls nee, firwat net?

Wéi gutt gëtt d’Fleesch vum Wëld kontrolléiert?

An der Hierschtsaison bidde vill gastronomesch Betriber Wëldfleesch un, wat zu Lëtzebuerg geschoss a verschafft gouf. Dëst Fleesch däerf fir de Commerce a fir d’Produktioun vun Iesswuere benotzt ginn. 

D’Juegdgesetz reegelt an dem Kontext den Ëmgank mat Déieren, déi geschoss goufen. Dat geschossent Déier muss virum Ofliwweren an d’Schluechthaus ausgeholl a markéiert ginn. D’Kontroll vum Fleesch gëtt am Schluechthaus duerchgefouert. Wat d’Killketten an d’Hygiènesmesurë betrefft, do bleift d’Gesetz flou. 

An eisen Nopeschlänner bemängelen Déiereschutzorganisatiounen dofir d’Consommatioun vun dësem Fleesch. De Konsum wär bedenklech, wéinst mangelhafter Hygiène, Kontrollen, an deelweis Belaaschtung duerch Toxinnen, resistente Keimen a Schwéiermetaller.

An deem Zesummenhang hu mir der Regierung dës Froe gestallt:

  1. Wéi vill Zäit däerf tëscht dem Ofschoss vum Déier an dem am Gesetz virgesinnen Schluechten vergoen? Anescht gefrot, wéi laang däerf een Déier nom Ofschoss ongekillt leie bleiwen? Kann de Landwirtschaftsminister versécheren, dass dës Delaien ëmmer agehale ginn? 
  2. Wéi eng staatlech onofhängeg Instanze kontrolléieren de Commerce vum Wëldfleesch? Ween kontrolléiert d’Anhale vun der Killketten? Wéi oft sinn dës Instanze bei de Juegten an de Schluechthaiser present fir d’hygienesch Kontrolle vum Wëld duerchzeféieren?
  3. Ass de Landwirtschaftsminister der Meenung, dass de Konsum vu Wëldfleesch onbedenklech ass? Kann de Minister an dem Zesummenhang eng Belaaschtung vum Fleesch duerch Bläi, Dioxinnen, resistent Bakterien a Cäsium ausschléissen?

A menger parlamentarescher Fro n°1403 hat ech déi zoustänneg Ministeren no Informatiounen iwwert geschossent Wëld-Fleesch gefrot. Aus der Äntwert op meng Froen erginn sech mir nei Froen. 

An deem Zesummenhang wéilt ech de Ministeren dës Froe stellen:

  • Op meng Fro, wéi laang een Déier nom Ofschoss ongekillt däerf leie bleiwen, äntwert d’Regierung:“”Des Legislatioun gesäit awer keng fixe Delaie fir, wéini dass geschossent Wëld muss gekillt ginn.””
    • Ass et deemno méiglech, dass och ongekilltend Wëld-Fleesch an de Verkaf kënnt?
    • Ass d’Killkette bei Juegdfleesch genau esou sécher, wéi um Bauerenhaff geziichtent Fleesch? 
  •  Op meng zweet Fro äntwert d’Regierung:“”All d’Karkassen, déi an déi sougenannten “ateliers de traitement de gibier” vun de Jeeër geliwwert ginn, gi vun den Inspektere vun der Veterinärsinspektioun kontrolléiert, ier se als genusstauglich gestempelt ginn an dann an de Commerce kommen. Bei de Wëllschwäi ginn och nach Prouwe geholl, fir d’Analysen op Trichinen ze maachen.””
    Opgeschlësselt pro Joer, wéi vill Analyse goufen an de leschten 3 Joer hei gemaach?
  •  Op meng Fro iwwert d’Belaaschtung duerch Bläi, Dioxinen asw. äntwerten d’Ministeren
    “Wat d’Réckstänn vu chemesche Substanze betrëfft, ginn all Joer eng Rei vun Analysen am Kader vun engem Kontrollplang, dee vun enger europäescher Direktive virgeschriwwen ass, gemaach. D’Zuel vun den Analysen an d’Substanzen, déi ënnersicht ginn, kann een am Rapport annuell vun der Veterinërsinspektioun noliesen.”
    Wéi vill Prozent vum Wëld-Fleesch, dat an de Verkaf kënnt, gëtt dësen Analysen ënnerzunn?
  •  Wéi d’Ministere schreiwen, kann een d’Zuel vun den Analysen an d’Substanzen, déi ënnersicht ginn, am järleche Rapport vun der Veterinärsinspektioun noliesen. De leschte Rapport, deen een um Site vun der Regierung fënnt, ass aus dem Joer 2016. Existéiere Rapporten aus de leschten 3 Joren a falls jo, wou kann een dës fannen? 
  • Am Rapport vun 2016 goufen 100 vun 100 Wëld-Analysen positiv op B3c (Métaux Lourds) getest. 
    • Ëm wéi eng en Schwéiermetaller handelt et sech genau?
    • Ab wéi engem Schwellewäert ass de Konsum vu B3c bedenklech fir d’Gesondheet vum Mënsch a wat de reellen Taux bei den Analysen?
    • Ab wéi enge Konzentratioune schwätzt ee vun enger signifikativer Belaaschtung bei de jeeweilege Réckstänn?

Waasser aus der Musel – eng gutt Qualitéit?

Wéi d’Tageblatt den 1ten Oktober 2019 gemellt huet, gouf et op der franséischer Säit vun der Musel een Incident beim Atomkraaftwierk zu Cattenom. Et ass net déi éischte Kéier, dass et am bal 40 Joer ale Kraaftwierk zu irreguläre Virfäll kennt. 

Dës Virfäll bleiwen ni ouni Konsequenze fir Lëtzebuerg, well d’Musel aus der Lorraine bei iwwert d’Grenz erafléisst a soumadden d’Waasserqualitéit an och Ëmwelt zu op eiser Säit direkt vun esou Incidenten betrafft sinn. An dem Kontext stellen sech och Froen zu der genereller Waasserqualitéit vun der Musel.

An deem Zesummenhang wéilt ech de Ministeren dës Froe stellen:

  1. Wéi hunn sech d’Maximalwäerter u Radioaktivitéit an deene leschten 10 Joren an der Musel entwéckelt? Kann d’Ministesch Erklärungen zu de Wäerter ginn?
  2. Wéi hunn sech d’Waasserwäerter generell an de leschte 5 Joer op der Musel entwéckelt, betreffend:
    • Waassertemperatur,
    • Sauerstoffgehalt,
    • pH-Wäert,
    • Pestizidréckstänn,
    • Herbizidréckstänn,
    • Medikamenteréckstänn,
    • aner Verschmotzungswäerter?
  3. Wat sinn an eischter Linn déi gréisste Verschmotzungsursaachen vun der Musel? 
  4. Wéi eng Mesuren huet d’Regierung säit 2013 ënnerholl fir d’Waasserqualitéit vun der Musel ze verbesseren? 

Plastiksgadgeten beim Staat

Op Eventer oder Fester si Gadgeten ee gutt Mëttel fir mat de Participanten an d’Gespréich ze kommen a fir beim Géigeniwwer an Erënnerung ze bleiwen. Och beim Staat gräife verschidde Ministèren op Gadgeten zeréck, déi dann op Eventer verdeelt ginn. Esou sinn op verschiddene Events, un deene Administratiounen deelhuelen heiansdo Loftballone mat der Opschrëft “Letz make it happen” ze gesinn, déi dekorativ opgehaangen oder verdeelt ginn.  A Kreesser vun Ëmweltschützer gi virun allem d’Loftballone schaarf kritiséiert, well et sech ëm Plastik handelt, deen no enger eemoleger Notzung bal ëmmer an der Dreckskëscht, oder nach schlëmmer an der Natur lant wou Déieren drun erstecke kënnen.

Am Kader vun der neier EU-Richtlinn iwwert de Verbuet vun Einwegplastik gi Loftballonen net verbueden, mee ënnerstinn enger Kennzeechefliicht. Trotzdeem bleift d’Fro, ob Ballonen am Kader vun Eventer wierklech néideg sinn.

An deem Zesummenhang wéilt ech dem Minister dës Froe stellen:

  1. Wéi vill Suen si vun 2013 bis 2019 fir Loftballonen ausgi ginn? Wéi vill Stock u Loftballonen existéieren aktuell nach bei de Ministèren?
  2. Wäert d’Regierung an allen ëffentlechen Institutiounen an noer Zukunft op de Gebrauch vu Loftballone souwéi anere Gadgeten aus Plastik verzichten?
  3. Deelt d’Madamm Ministesch d’Bedenken, dass Loftballonen eng Ressourcëverschwendung an ee Risiko fir d’Ëmwelt duerstellen?

Ginn d’Wëllschwäin elo massiv ofgeschoss?

D’Regierung hat den 8te Mäerz decidéiert, d’Juegd op Wëllschwäin schoun dëse Mount ze erlaben, mat der Begrënnung d’afrikanesch Schwéngspescht anzedämmen. Mer froen eis, firwat a wéi dës Erlaabnis zustane komm ass a wien d’Regierung do wuel mat beroden huet?

Den 8ten Mäerz huet de Regierungsrot säin Accord ginn, fir d’Juegd op Wëllschwäin ze Erëffnungen. Esou däerfen d’Wëllschwäinn, am Géigesaz zu de virege Joren, dëst Joer schonn ab Mäerz geschoss ginn. D’Begrënnung fir dës exzeptionell Ouverture fousst op de Konklusioune vum Rapport vun der Task Force fir d’Schwéngspescht, fir d’Verbreedung vun der Krankheet verhënneren.

An deem Zesummenhang wéilt ech de Ministeren dës Froe stellen:

  1. Wéi vill Wëllschwäin goufen zu Lëtzebuerg positiv op d’afrikanesch Schwéngspescht getest?
  2. Wei ustiechend ass d’Schwéngschpescht fir Mënschen? Falls d’Äntwert
    negativ ass, wéi rechtfäerdegt d’Regierung d’massivt Ofschéisse vu Wëllschwäi an der Ofwiesenheet vun direkte Risiken vun der Schwéngspescht op d’Gesondheet vum Mënsch?
  3. Goufe bei de Gespréicher vun der Task Force fir d’Schwéngspescht och
    Meenunge vun Déiereschutzorganisatiounen, déi am Artikel 6 (3) vum Déiereschutzgesetz definéiert sinn, ageholl? Falls jo, wat waren d’Positioune vun den eenzelen Associatiounen a wéi huet d’Regierung dës Positiounen an de Reglement matgedroen? Falls nee, gesäit d’Regierung et net als relevant un Déiereschutzorganisatiounen an dëst Themefeld matanzebezéien?
  4. Gesäit d’Regierung d’Jeeër als Partner bei der Bekämpfung vun der Schwéngspescht?
  5. Wäert d’Regierung der Jeeërfederatioun FSHCL hire Fuerderung nokommen, d’Juegd op Wëllschwäin op dat ganzt Joer auszebreeden?
  6. Wäert d’Regierung der Jeeërfederatioun FSHCL hire Fuerderung nokommen, de Gebrauch vun hallefautomatesche Waffe fir d’Juegd ze erlaben?
  7. Wäert d’Regierung fir d’Juegd vu Wëllschwäin d’Klappjuegd als Juegdmethod recommandéieren?

Mat déiwem Respekt,

GOERGEN Marc

Député